દિગ્વિજય સિંહનું મોટું નિવેદન, મધ્યપ્રદેશમાં કોંગ્રેસ બજરંગ દળ પર પ્રતિબંધ નહીં મૂકે

કર્ણાટક વિધાનસભા ચૂંટણીમાં ‘બજરંગ દળ પ્રતિબંધ’ની વાત કરનાર કોંગ્રેસે મધ્યપ્રદેશમાં વિપરીત વલણ અપનાવ્યું છે. પાર્ટીના વરિષ્ઠ નેતા અને રાજ્યસભા સાંસદ દિગ્વિજય સિંહે આ વાતની પુષ્ટિ કરી છે. તેમણે કહ્યું કે કોંગ્રેસ મધ્યપ્રદેશમાં બજરંગ દળ પર પ્રતિબંધ નહીં મૂકે.

મધ્યપ્રદેશના પૂર્વ મુખ્યમંત્રી અને કોંગ્રેસના નેતા દિગ્વિજય સિંહે કહ્યું કે જો અમે મધ્યપ્રદેશમાં ચૂંટણી જીતીશું  તો બજરંગ દળ પર પ્રતિબંધ નહીં મૂકીએ. બજરંગ દળમાં કેટલાક સારા લોકો હોઈ શકે છે, પરંતુ અમે રમખાણો અને હિંસામાં સામેલ કોઈને પણ છોડીશું નહીં

ઉલ્લેખનીય છે કે, આ વર્ષે કર્ણાટક વિધાનસભાની ચૂંટણી યોજાઈ હતી, જે પહેલા કોંગ્રેસે પોતાના ઘોષણાપત્રમાં બજરંગ દળ પર પ્રતિબંધ લગાવવાની વાત કરી હતી. આ પછી રાજકારણ ગરમાયું હતું અને આ વાત દેશભરમાં ચર્ચાનો વિષય બની હતી. ભાજપે ચૂંટણી પ્રચારમાં કોંગ્રેસની જાહેરાતનો સહારો લીધો હતો.

વડાપ્રધાન નરેન્દ્ર મોદીએ પણ ચૂંટણી મંચ દ્વારા બજરંગબલીના મુદ્દે જોરદાર પ્રચાર કર્યો હતો. જોકે ભાજપ ચૂંટણી જીતવામાં નિષ્ફળ રહ્યું હતું. જણાવી દઈએ કે કોંગ્રેસે ચૂંટણીમાં જોરદાર જીત નોંધાવી હતી. કોંગ્રેસ સ્પષ્ટ બહુમતી સાથે રાજ્યમાં સત્તા પર આવી અને કોંગ્રેસે ભાજપને બહારનો રસ્તો બતાવ્યો. કર્ણાટકની તર્જ પર મધ્યપ્રદેશમાં પણ કોંગ્રેસ આગળ વધતી જોવા મળી રહી છે. પરંતુ મધ્યપ્રદેશમાં બજરંગ દળ પર પ્રતિબંધ મૂકવાની બાબતને નજરઅંદાજ કરવામાં આવી રહી છે.

જણાવી દઈએ કે મધ્યપ્રદેશમાં વર્ષના અંતમાં વિધાનસભા ચૂંટણી યોજાવાની છે, જેના માટે ભારતીય જનતા પાર્ટી અને કોંગ્રેસે તૈયારીઓ કરી લીધી છે. મુખ્યમંત્રી શિવરાજ સિંહ ચૌહાણની સાથે કમલનાથ અને દિગ્વિજય સિંહ સહિતના ભાજપ અને કોંગ્રેસના અગ્રણી ચહેરાઓ ચૂંટણીના પવનને પોતાની પાર્ટી તરફ વાળવાનો પ્રયાસ કરી રહ્યા છે.