સુપ્રીમ કોર્ટે તિસ્તા સેતલવાડને જામીન આપ્યા, ગુજરાત હાઈકોર્ટના ચૂકાદાને રદ્દ કર્યો

તિસ્તા સેતલવાડને સુપ્રીમ કોર્ટમાંથી મોટી રાહત મળી છે. સુપ્રીમ કોર્ટે આજે તેમને જામીન આપ્યા છે. નોંધપાત્ર બાબત એ છે કે, તિસ્તા સેતલવાડ પર ગુજરાત રમખાણોના કેસમાં નકલી સોગંદનામું દાખલ કરીને કોર્ટની કાર્યવાહીને પ્રભાવિત કરવાનો આરોપ છે અને 1 જુલાઈના રોજ, ગુજરાત હાઈકોર્ટે તિસ્તાના જામીન રદ કર્યા હતા અને તેને આત્મસમર્પણ કરવાનું કહ્યું હતું.

ગુજરાત હાઈકોર્ટના નિર્ણયને સુપ્રીમ કોર્ટે ફગાવી દીધો છે. સુપ્રીમ કોર્ટે કહ્યું કે – તિસ્તાનો પાસપોર્ટ નીચલી કોર્ટમાં સરેન્ડર રહેશે, તિસ્તા સાક્ષીઓને પ્રભાવિત નહીં કરે. સુપ્રીમ કોર્ટે એમ પણ કહ્યું કે, મોટાભાગના પુરાવા દસ્તાવેજી છે, ચાર્જશીટ દાખલ કરવામાં આવી છે તેથી તિસ્તાની કસ્ટોડિયલ પૂછપરછની જરૂર નથી.

સુપ્રીમ કોર્ટે કહ્યું કે, જો તિસ્તા જામીનની શરતોનું ઉલ્લંઘન કરે છે તો સરકાર અરજી દાખલ કરી શકે છે. નીચલી અદાલતે હાઈકોર્ટ કે સુપ્રીમ કોર્ટની કોઈપણ ટિપ્પણીથી પ્રભાવિત થવાની જરૂર નથી. નિર્ણયમાં સુપ્રીમ કોર્ટે હાઈકોર્ટ પર સવાલો ઉઠાવ્યા છે. સુપ્રીમ કોર્ટે કહ્યું કે હાઈકોર્ટનો નિર્ણય વિકૃત છે. હાઈકોર્ટે જે પ્રકારનો નિર્ણય આપ્યો છે તેના કારણે આરોપીઓને જામીન મળવા મુશ્કેલ છે. તિસ્તાએ એફઆઈઆર રદ કરવા માટે અરજી કરી ન હોવાનું હાઈકોર્ટનું તારણ ખોટું છે.

સુનાવણી દરમિયાન કપિલ સિબ્બલે તિસ્તા વતી સમગ્ર મામલાની સ્પષ્ટતા કરી હતી. તેમણે કહ્યું કે એફઆઈઆર બનાવટી પુરાવા દ્વારા નોંધવામાં આવી હતી. ગુજરાત હાઈકોર્ટે તેના નિયમિત જામીન નામંજૂર કર્યા બાદ કાર્યકર્તા તિસ્તા સેતલવાડે શનિવારે સુપ્રીમ કોર્ટમાં અરજી કરી હતી, પરંતુ ન્યાયાધીશો તેને વચગાળાનું રક્ષણ આપવાના મુદ્દે વિભાજિત દેખાયા હતા. આ કેસ 2002 પછીના ગોધરા રમખાણોના કેસમાં નિર્દોષ લોકોને ફસાવવા માટે પુરાવાના કથિત બનાવટ સાથે સંબંધિત છે.

ગયા વર્ષે સપ્ટેમ્બરમાં સુપ્રીમ કોર્ટે તિસ્તા સેતલવાડને વચગાળાના જામીન પર મુક્ત કર્યા હતા અને ગુજરાત હાઈકોર્ટને યોગ્યતાના આધારે આ મામલે નિર્ણય લેવા જણાવ્યું હતું. ગયા શનિવારે હાઈકોર્ટે તિસ્તાના જામીન રદ્દ કર્યા હતા અને તેને તાત્કાલિક શરણાગતિ સ્વીકારવાનું કહ્યું હતું. તિસ્તાએ સુપ્રીમ કોર્ટમાં અપીલ કરી હતી. રજા હોવા છતાં જસ્ટિસ અભય એસ. ઓક અને જસ્ટિસ પ્રશાંત મિશ્રાની ખંડપીઠ સાંજે 6.30 વાગ્યે સુપ્રીમ કોર્ટમાં બેઠી હતી. સુનાવણી દરમિયાન બંને જજોના મંતવ્યો અલગ-અલગ હતા. તેથી ત્રણ જજની બેંચ સમક્ષ આ મામલાની સુનાવણી કરવાની ભલામણ કરવામાં આવી હતી. તે જ રાત્રે 9.15 વાગ્યે જસ્ટિસ બીઆર ગવઈ, જસ્ટિસ એએસ બોપન્ના અને જસ્ટિસ દીપાંકર દત્તાની ખંડપીઠે તિસ્તાને એક સપ્તાહ માટે રાહત આપતા કહ્યું કે અરજદાર મહિલા છે, તેથી તે રાહતની હકદાર છે. બાદમાં આ રાહતને 19 જુલાઈ સુધી લંબાવવામાં આવી હતી.

તિસ્તા વતી કપિલ સિબ્બલે સમગ્ર મામલે ખુલાસો કરતા કહ્યું હતું કે, “જૂઠા પુરાવા દ્વારા એફઆઈઆર નોંધવામાં આવી હતી. એફઆઈઆર નોંધ્યા બાદ તિસ્તાની ધરપકડ કરવામાં આવી હતી. હજુ સુધી કોઈ તપાસ આગળ વધી નથી. છ દિવસના પોલીસ રિમાન્ડ લીધા બાદ પણ પૂછપરછ કરવામાં આવી હતી. માત્ર એક દિવસ માટે કર્યું.ગુજરાત હાઈકોર્ટે વચગાળાની જામીન માટેની અરજી ફગાવી દીધી, કારણ કે તે વખતે ચાર્જશીટ દાખલ થઈ ન હતી. ચાર્જશીટ પણ ફાઈલ થઈ હતી, પરંતુ તિસ્તાને જામીન મળ્યા ન હતા. હવે સુપ્રીમ કોર્ટમાંથી વચગાળાના જામીન મળી ગયા છે.