રશિયામાં પુતિનની સામે બળવો કરનારા વેગનર ચીફ પ્રિગોઝિનનું પ્લેન ક્રેશમાં મોત, પ્લેન ક્રેશ પહેલાં થયા બે વિસ્ફોટ

ખાનગી લશ્કરી કંપની વેગનરના વડા યેવજેની પ્રિગોઝિનના મૃત્યુના સમાચાર છે. તેમનું પ્લેન ક્રેશમાં મૃત્યુ થયું હતું. આ પ્લેન મોસ્કોથી ઉડ્યું હતું અને સેન્ટ પીટર્સબર્ગ જઈ રહ્યું હતું. પ્રિગોઝિન સાથે આ પ્લેનમાં કુલ 10 લોકો સવાર હતા. પ્રિગોઝિન ત્યારે ચર્ચામાં આવ્યા જ્યારે આ વર્ષે જૂનમાં તેણે રશિયન રાષ્ટ્રપતિ પુતિન વિરુદ્ધ બળવાની ચેતવણી ઉચ્ચારી હતી.એવું પણ કહેવાય છે કે પ્લેન ક્રેશ પહેલા બે વિસ્ફોટ સંભળાયા હતા. જેના કારણે વિમાન પર હુમલાની આશંકા પણ વ્યક્ત કરવામાં આવી રહી છે.

રશિયન અધિકારીઓએ જણાવ્યું હતું કે વિમાન દુર્ઘટનામાં 10 લોકો માર્યા ગયા હતા, જેમાં વેગનરના ચીફ યેવજેની પ્રિગોઝિનનો પણ સમાવેશ થાય છે. બળવોનું નેતૃત્વ કરતા પહેલા તે વ્લાદિમીર પુતિનની ખૂબ નજીક હતો.

અધિકારીઓના જણાવ્યા અનુસાર ત્રણ પાઇલોટ અને સાત મુસાફરોને લઈને વિમાન મોસ્કોથી સેન્ટ પીટર્સબર્ગ જઈ રહ્યું હતું. રશિયાની સિવિલ એવિએશન ઓથોરિટીએ જણાવ્યું હતું કે પ્રિગોઝિન પ્લેનના પેસેન્જર લિસ્ટમાં હતો.

ભાડૂતી સૈનિકોએ તેમના નેતાના મૃત્યુનો “બદલો” લેવાની પ્રતિજ્ઞા લીધી હતી અને બે રશિયન પ્રદેશોમાં સુરક્ષા દળોને વધતા જોખમને કારણે એલર્ટ પર રાખવામાં આવ્યા હતા, ધ ટાઇમ્સે અહેવાલ આપ્યો હતો.

જૂનના અંતમાં રશિયાના લશ્કરી નેતૃત્વ સામે અલ્પજીવી બળવો શરૂ કર્યો ત્યારથી પ્રિગોઝિનનું ભાવિ તીવ્ર અટકળોનો વિષય છે.

રશિયન પ્રમુખ વ્લાદિમીર પુતિને ગુરુવારે સવારે BRIC દેશોની એક બેઠકને સંબોધિત કરી હતી પરંતુ તેમણે કે ક્રેમલિનના અન્ય કોઈ અધિકારીઓએ પ્લેન ક્રેશ અંગે જાહેરમાં ટિપ્પણી કરી નથી.