ગોધરાકાંડમાં ટ્રેનમાં આગ લગાડનાર ત્રણ અપરાધીઓની જામીન અરજી સુપ્રીમ કોર્ટે ફગાવી

2002 માં ગોધરામાં સાબરમતી એક્સપ્રેસને આગ ચાંપનાર ત્રણ દોષિતોની જામીન અરજી સુપ્રીમ કોર્ટે ફગાવી દીધી છે. સીજેઆઈ એ કહ્યું આ ગંભીર મામલો છે, અમે પહેલા કહી ચૂક્યા છીએ કે જેમની ફાંસીની સજા આજીવન કારાવાસમાં ફેરવાઈ છે તેમને જામીન નહીં મળે, અને જેમણે સળગતી ટ્રેનમાં પેટ્રોલ છાંટવામાં ચોક્કસ ભૂમિકા ભજવી હતી તેમને પણ જામીન આપવામાં આવશે નહીં.

2002 માં ગોધરામાં સાબરમતી એક્સપ્રેસમાં આગ લગાડવાના દોષિતોને જામીન આપવાના મુદ્દે આજે સુપ્રીમ કોર્ટમાં સુનાવણી હાથ ધરવામાં આવી હતી. કોર્ટે ત્રણેય દોષિતોને જામીન આપવાનો ઈન્કાર કર્યો હતો. ત્રણેય દોષિતો આજીવન કેદની સજા ભોગવી રહ્યા છે. સુપ્રિમ કોર્ટે કહ્યું, આ ઘટના ખૂબ જ ગંભીર ઘટના છે. આ એકલા વ્યક્તિના મૃત્યુનો મામલો નથી, અમે દોષિતોની અપીલ પર સુનાવણી માટે બેન્ચની રચના કરીશું.

સુનાવણી દરમિયાન સીજેઆઈ એ કહ્યું કે, અમે પહેલાથી જ કહ્યું હતું કે, જેમની ફાંસીની સજાને આજીવન કેદમાં ફેરવવામાં આવી છે તેમને જામીન આપવામાં આવશે નહીં. જેમણે સળગતી ટ્રેનમાં પેટ્રોલ છાંટવામાં ચોક્કસ ભૂમિકા ભજવી હતી તેમને પણ જામીન આપવામાં આવશે નહીં. ત્રણેય સામે ચોક્કસ આક્ષેપો છે અને આ બાબત પણ ગંભીર છે. આ કોઈ એક વ્યક્તિના મૃત્યુની વાત નથી. સુપ્રીમ કોર્ટે ગત્ વખતે 12 માંથી 8 ને જામીન આપ્યા હતાં, જો કે સુપ્રીમ કોર્ટે એક આરોપીની પત્નીને કેન્સરના કારણે વચગાળાના જામીનની મુદ્ત વધારી દીધી હતી.

સુપ્રીમ કોર્ટ 2002 માં ગોધરા સાબરમતી એક્સપ્રેસ ટ્રેન સળગાવવામાં 59 લોકોને જીવતા મારી નાખવા મામલે આજીવન કારાવાસની સજા ભોગવી રહેલા અબ્દુલ રહેમાન ધંતિયા, અબ્દુલ સત્તાર ઈબ્રાહીમ ગદ્દી અને શૌકત વતી દાખલ જામીન અરજી પર સુનાવણી દાખલ કરી હતી. ગુજરાત સરકાર વતી સોલીસીટર જનરલ તુષાર મહેતાએ કોર્ટને જણાવ્યું હતું કે, આ ફક્ત પથ્થરમારાનો મામલો નહોતો, દોષિતોએ સાબરમતી એક્સપ્રેસના એક ડબાને બંધ કરી દીધો હતો જેમાં 59 લોકોના મોત નિપજ્યા હતાં અને સેંકડો ઘવાયા હતાં.