આંધ્રપ્રદેશના પૂર્વ CM ચંદ્રબાબુ નાયડુની મુશ્કેલીઓ વધી, કોર્ટે 14 દિવસની જ્યુડિશિયલ કસ્ટડીમાં મોકલી દીધા

કોર્ટે કથિત ભ્રષ્ટાચારના કેસમાં ધરપકડ કરાયેલા આંધ્રપ્રદેશના પૂર્વ મુખ્યમંત્રી ચંદ્રબાબુ નાયડુને 14 દિવસની ન્યાયિક કસ્ટડીમાં મોકલી દીધા છે. તેલુગુ દેશમ પાર્ટી (ટીડીપી) ના પ્રમુખ એન ચંદ્રબાબુ નાયડુને કથિત ભ્રષ્ટાચારના કેસમાં ધરપકડ કર્યાના એક દિવસ પછી, રવિવારે સવારે ભ્રષ્ટાચાર વિરોધી બ્યુરો (એસીબી) કોર્ટમાં રજૂ કરવામાં આવ્યા હતા. શનિવારે રાત્રે 3.40 વાગ્યે નાયડુને મેડિકલ તપાસ માટે વિજયવાડાની સરકારી જનરલ હોસ્પિટલમાં લઈ જવામાં આવ્યા હતા. અગાઉ, અહીં કંચનપલ્લી ખાતે CID સ્પેશિયલ ઇન્વેસ્ટિગેશન ટીમ (SIT) ઓફિસમાં લગભગ 10 કલાક સુધી તેની પૂછપરછ કરવામાં આવી હતી.

કરોડો રૂપિયાના ભ્રષ્ટાચારના કેસમાં ધરપકડ કરાયેલ ટીડીપીના વડા એન. ચંદ્રબાબુ નાયડુના રિમાન્ડ પર કોર્ટના નિર્ણય પહેલા, આંધ્રપ્રદેશ પોલીસે કોઈપણ પ્રતિકૂળ પરિસ્થિતિને પહોંચી વળવા માટે કડક સુરક્ષા વ્યવસ્થા કરી છે. વિજયવાડા શહેરમાં પોલીસકર્મીઓ તૈનાત કરવામાં આવ્યા હતા.

CIDની ટીમે શનિવારે સવારે લગભગ 6 વાગ્યે આંધ્રપ્રદેશના પૂર્વ મુખ્યમંત્રીની નંદ્યાલ શહેરના જ્ઞાનપુરમ ખાતેના આરકે ફંક્શન હોલની બહારથી ધરપકડ કરી હતી. નાયડુ તમામ સુવિધાઓથી સજ્જ પોતાની બસમાં સૂતા હતા ત્યારે તેમની ધરપકડ કરવામાં આવી હતી. આંધ્રપ્રદેશ પોલીસે શનિવારે કથિત કૌશલ્ય વિકાસ નિગમ કૌભાંડમાં નાયડુને ‘ચાવીરૂપ કાવતરાખોર’ ગણાવ્યા હતા. આ કથિત કૌભાંડને કારણે રાજ્ય સરકારને 300 કરોડ રૂપિયાનું નુકસાન થયું હોવાનો આરોપ છે. CID ચીફ એન સંજયે કહ્યું હતું કે નાયડુ આ કેસમાં મુખ્ય કાવતરાખોર હતા.