હિમાચલ પ્રદેશમાં વરસાદથી ભારે ખાનાખરાબી: કુલ્લુમાં આઠ ઈમારતો ધરાશાયી થઈ

હિમાચલ પ્રદેશના કુલ્લુ જિલ્લાના અન્ની વિસ્તારમાં ગુરુવારે તાજેતરના ભારે વરસાદને કારણે તિરાડો પડી જતાં અસુરક્ષિત જાહેર કરાયેલી ઓછામાં ઓછી આઠ ઇમારતો ધરાશાયી થઈ ગઈ હતી.

અકસ્માતમાં કોઈ જાનહાનિ થઈ ન હતી. ઈમારતો ધરાશાયી થવાને કારણે ચારે બાજુ ધૂળ અને કાટમાળના વાદળો છવાઈ ગયા હતા.

ઘટનાસ્થળે હાજર અન્ની સબ-ડિવિઝનલ મેજિસ્ટ્રેટ (એસડીએમ) નરેશ વર્માએ જણાવ્યું હતું કે આ ઈમારતોમાં દુકાનો, બેંકો અને અન્ય વ્યાપારી સંસ્થાઓ હતી. ચાર-પાંચ દિવસ પહેલા ઈમારતોમાં તિરાડો દેખાઈ હતી અને તેને અસુરક્ષિત જાહેર કરવામાં આવી હતી. તેમણે કહ્યું કે હાલમાં જ તમામ ઈમારતો ખાલી કરાવવામાં આવી હતી.

અધિકારીએ કહ્યું કે નુકસાનનું મૂલ્યાંકન કરવામાં આવી રહ્યું છે અને અન્ની વિસ્તારમાં રાષ્ટ્રીય ધોરીમાર્ગ-305 પર સ્થિત કેટલીક અન્ય અસુરક્ષિત ઇમારતોને પણ સાવચેતીના પગલા તરીકે ખાલી કરાવવામાં આવી છે.

હિમાચલ પ્રદેશમાં આ મહિને વરસાદ સંબંધિત ઘટનાઓમાં લગભગ 120 લોકોના મોત થયા છે. રાજ્યમાં 24 જૂને ચોમાસાની શરૂઆત થઈ ત્યારથી અત્યાર સુધીમાં વરસાદ સંબંધિત ઘટનાઓમાં કુલ 238 લોકોએ જીવ ગુમાવ્યા છે અને 40 લોકો હજુ પણ ગુમ છે.

રાજ્યમાં મંગળવારે રાત્રે મુશળધાર વરસાદનો ત્રીજો સ્પેલ આવ્યો, જેના કારણે શિમલા શહેરમાં ભારે નુકસાન થયું. મંડી અને કુલ્લુ જિલ્લામાં 9 અને 10 જુલાઈના રોજ ભારે વરસાદ થયો હતો. 14 અને 15 ઓગસ્ટે સિમલા અને સોલન જિલ્લામાં વરસાદે વિનાશ વેર્યો હતો. મંગળવારે રાતથી ત્રીજા તબક્કામાં શિમલામાં હાહાકાર મચી ગયો છે.

મુખ્યમંત્રી સુખવિંદર સિંહ સુખુએ બુધવારે જણાવ્યું હતું કે ક્ષતિગ્રસ્ત માળખાના પુનઃસ્થાપન માટે રાજ્યના તમામ ડેપ્યુટી કમિશનરો અને સંબંધિત વિભાગોને 165.22 કરોડ રૂપિયા જારી કરવામાં આવ્યા છે.
તેમણે દાવો કર્યો હતો કે ભારે વરસાદને કારણે રાજ્યને અત્યાર સુધીમાં લગભગ 10,000 કરોડ રૂપિયાનું નુકસાન થયું છે.