નવાઝુદ્દીન સિદ્દીકીના પરિવારમાં મિલકતનો વિવાદ, 100 કરોડની સંપત્તિનો મામલો કોર્ટમાં પહોંચ્યો

યુપીના મુઝફ્ફરનગરના ફિલ્મ અભિનેતા નવાઝુદ્દીન સિદ્દીકીના પરિવારમાં કરોડો રૂપિયાની પૈતૃક સંપત્તિને લઈને વિવાદ થયો છે. નાના ભાઈ શમશુદ્દીને સિવિલ જજ સિનિયર ડિવિઝન કોર્ટમાં મિલકતના વિભાજનની માગણી કરી છે. કોર્ટે નવાઝુદ્દીનની માતા મેહરુન્નિશા અને પરિવારના અન્ય સભ્યોને નોટિસ પાઠવીને તેમનો પક્ષ રજૂ કરવાનો આદેશ આપ્યો છે. આ કેસમાં સુનાવણીની આગામી તારીખ 22 ડિસેમ્બર નક્કી કરવામાં આવી છે.

વરિષ્ઠ વકીલ ખુર્શીદ ફારૂકીએ કહ્યું કે અભિનેતા નવાઝુદ્દીન સિદ્દીકીના પિતા નવાબુદ્દીનની બુઢાણા શહેરમાં કરોડોની સંપત્તિ છે. નવાબુદ્દીનના મૃત્યુ પછી મિલકતની વર્તમાન વારસદાર તેની પત્ની મેહરુનિશા છે. તેમણે કહ્યું કે મિલકતના વિભાજન માટેનો દાવો સિવિલ જજ સિનિયર ડિવિઝન કોર્ટમાં 17 નવેમ્બર, 2023ના રોજ મિલકતના વારસદાર અને અભિનેતા નવાઝુદ્દીનના ભાઈ સામે દાખલ કરવામાં આવ્યો હતો.

એક સાથે સાત વારસદારોને નોટિસ ફટકારી

કોર્ટે આ કેસમાં સુનાવણી માટે વાદી શમશુદ્દીનની માતા મેહરુનિશા અને ભાઈ નવાઝુદ્દીન સિદ્દીકી સહિત બાકીના સાત વારસદારોને નોટિસ પાઠવી છે. તેમણે કહ્યું કે કોર્ટે આ કેસમાં સુનાવણીની આગામી તારીખ 22 ડિસેમ્બર નક્કી કરી છે.

વિલમાં એક સમાન મિલકત આપવાનું લખાણ

શમશુદ્દીન સિદ્દીકીએ જણાવ્યું કે જ્યારે તેમના પિતા જીવતા હતા ત્યારે તેઓ સાતેય ભાઈઓ, બહેન અને માતા વચ્ચે પૈતૃક સંપત્તિની સમાન વહેંચણીની વાત કરતા હતા. એક રીતે, આ તેમની મૌખિક ઇચ્છા હતી. તેણે કહ્યું કે તેના પિતાના મૃત્યુ બાદ તેને પ્રોપર્ટીની વહેંચણી કરવાની જરૂર પડી. પૈતૃક સંપત્તિની કિંમત 100 કરોડ રૂપિયાથી વધુ છે. આમાં બુઢાણા નગરમાં ઘણાં મકાનો, દુકાનો, બજારો અને અન્ય મિલકતોનો સમાવેશ થાય છે. તેમણે કહ્યું કે તેણે મિલકતની વહેંચણી અંગે દાવો દાખલ કર્યો છે.