મૂકેશ અંબાણીને ફરી એકવાર મળી મોતની ધમકીઃ હવે 400 કરોડ માંગ્યા, બેલ્જિયમથી મેઈલ કરાયો

મુકેશ અંબાણીને અઠવાડિયામાં જ ત્રીજી વખત મોતની ધમકી મળી છે અને હવે 200 નહીં 400 કરોડ માંગ્યા છે. આ પહેલા 20 કરોડ અને 200 કરોડ માંગ્યા હતાં, પ્રાથમિક તપાસમાં આ મેઈલ બેલ્જિયમથી આવ્યો હોવાનું ખૂલ્યું છે.

દેશના ઉદ્યોગપતિઓમાંથી મુકેશ અંબાણીને એક અઠવાડિયામાં ત્રીજી વખત જાનથી મારી નાખવાની ધમકી આપવામાં આવી છે. ધમકી આપનારે પહેલા બે વખતમાં 20 કરોડ અને ત્યારપછી ર૦૦ કરોડ રૃપિયાની ખંડણી માંગી હતી, ત્યારે હવે તેણે 400 કરોડ રૃપિયાની ખંડણી માંગી છે.

મુકેશ અંબાણીને આ પહેલા શનિવારે ઈમેઈલ કરીને જાનથી મારી નાખવાની ધમકી આપી હતી અને 20 કરોડ રૃપિયા માંગ્યા હતાં. આ ઉપરાંત બીજા દિવસે એ જ ઈમેઈલ દ્વારા ફરીવાર ધમકી આપીને રૃપિયા 200 કરોડની ખંડણી માંગી હતી. ત્યારે હવે ધમકી આપનાર વ્યક્તિએ અંબાણી પાસેથી 400 કરોડ રૃપિયાની ખંડણી માંગી છે.

ઉલ્લેખનીય છે કે, અઠવાડિયામાં આ ત્રીજી વખત મુકેશ અંબાણીને ધમકી આપી છે. છેલ્લા ઈમેઈલમાં ખંડણી માંગનાર વ્યક્તિએ લખ્યું છે કે, હવે અમે અમારી માંગ વધારીને 400 કરોડ કરી દીધી છે અને જો પોલીસ મને ન શોધી શકે તો તે મારી ધરપકડ પણ કરી શકશે નહીં. હાલ મહારાષ્ટ્રની સાયબર ક્રાઈમ સેલ અને ક્રાઈમ બ્રાંચ તપાસ કરી રહી છે. પોલીસની પ્રાથમિક તપાસમાં આ મેઈલ બેલ્જિયમથી આવ્યો હોવાનું સામે આવ્યું છે.

આ અગાઉ ધમકી આપનાર વ્યક્તિએ મુકેશ અંબાણીની કંપનીના ઈમેઈલ આઈડી પર મોકલેલા મેસેજમાં લખ્યું હતું કે, જો તમે અમને 20 કરોડ રૃપિયા નહીં આપો તો અમે તમને જાનથી મારી નાખીશું. અમારી પાસે ભારતમાં બેસ્ટ શૂટર્સ છે. આ ઈમેઈલ મળ્યાં બાદ મુકેશ અંબાણીના સિક્યોરિટી ઈન્ચાર્જની ફરિયાદ પર મુંબઈની ગામ દેવી પોલીસે અજાણ્યા વ્યક્તિ સામે આઈપીસીની કલમ 387 અને 506 (2) હેઠળ કેસ નોંધ્યો હતો.