તોશાખાના કેસમાં પાકિસ્તાનના પૂર્વ PM ઈમરાન દોષિત, ત્રણ વર્ષની સજા, ધરપકડ, પાંચ વર્ષ સુધી ચૂંટણી લડી શકશે નહીં

પાકિસ્તાનના પૂર્વ પીએમ ઈમરાન ખાનને મોટો ઝટકો લાગ્યો છે. પાકિસ્તાનની ટ્રાયલ કોર્ટે ઈમરાન ખાનને સરકારી ભેટો (તોશાખાના કેસ) ગેરકાયદેસર રીતે વેચવા બદલ 3 વર્ષની જેલની સજા ફટકારી છે. જિલ્લા અને સેશન્સ કોર્ટે તોશાખાના કેસમાં પાકિસ્તાન તહરીક-એ-ઈન્સાફ (પીટીઆઈ)ના અધ્યક્ષ ઈમરાનને દોષિત ઠેરવ્યા છે.

લાહોરમાંથી ધરપકડ

ઈમરાન વિરુદ્ધ ફેંસલો આવતા જ પાકિસ્તાન પોલીસે પણ કાર્યવાહી કરી છે. ઈમરાન ખાનની લાહોરથી ધરપકડ કરવામાં આવી છે.

કાયદાકીય નિષ્ણાતોનું કહેવું છે કે આ કેસમાં દોષિત ઠેરવવાથી ઈમરાન ખાનની રાજકીય કારકિર્દી ખતમ થઈ શકે છે. ઈમરાન નવેમ્બરની શરૂઆત પહેલા યોજાનારી સામાન્ય ચૂંટણીમાં ભાગ લે તેવી શક્યતા ઓછી છે અને તે 5 વર્ષ સુધી ચૂંટણી લડી શકશે નહીં.

શું છે તોશાખાના કેસ?

ઈમરાન ખાન પર 2018 અને 2022 વચ્ચે સરકારી ગિફ્ટ વેચીને પૈસા કમાવવાનો આરોપ હતો. આ ભેટ ઈમરાનને તેના વિદેશ પ્રવાસ દરમિયાન મળી હતી. પાકિસ્તાનના કાયદા અનુસાર, આ ભેટોને સ્ટેટ ડિપોઝિટરી (તોશાખાના)માં રાખવાની હોય છે. જો કે, જો કોઈ પીએમ તેમને પોતાની સાથે રાખવા માંગે છે, તો તેણે હરાજી હેઠળ કિંમત ચૂકવવી પડશે.

આરોપ છે કે ઇમરાને તોશાખાનામાંથી આ ગિફ્ટ્સ 2.15 કરોડ રૂપિયામાં ખરીદી હતી અને તેને 5 કરોડ રૂપિયાથી વધુમાં વેચીને મોટો ફાયદો કર્યો હતો. આ ભેટોમાં મોંઘી કાર, પેન અને મોંઘી વીંટી પણ સામેલ હતી.