કોંગ્રેસે કન્હૈયા કુમારને સોંપી મોટી જવાબદારી, NSUIના પ્રભારી નિયુક્ત કર્યા

કોંગ્રેસે ગુરુવારે (6 જુલાઈ) એક મોટી જવાબદારી આપતા કન્હૈયા કુમારને તેની વિદ્યાર્થી પાંખ નેશનલ સ્ટુડન્ટ્સ યુનિયન ઓફ ઈન્ડિયા (NSUI)ના પ્રભારી નિયુક્ત કર્યા છે. કોંગ્રેસના સંગઠન મહાસચિવ કે.સી. વેણુગોપાલે એક અખબારી યાદી જારી કરીને આ માહિતી આપી હતી. અગાઉ, રૂચિ ગુપ્તા એનએસયુઆઈના પ્રભારી હતા જેમણે લગભગ અઢી વર્ષ પહેલાં પદ પરથી રાજીનામું આપ્યું હતું.

તેમણે કહ્યું કે કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ કન્હૈયા કુમારને તાત્કાલિક અસરથી નેશનલ સ્ટુડન્ટ્સ યુનિયન ઓફ ઈન્ડિયા (NSUI)ના AICC પ્રભારી તરીકે નિયુક્ત કર્યા છે. કન્હૈયા કુમાર જેએનયુ વિદ્યાર્થી સંઘના પ્રમુખ રહી ચૂક્યા છે.

2019માં લોકસભાની ચૂંટણી લડી હતી

કન્હૈયાએ 2019ની લોકસભા ચૂંટણી બેગુસરાઈથી કમ્યુનિસ્ટ પાર્ટી ઑફ ઈન્ડિયાની ટિકિટ પર લડી હતી. જોકે તેઓ ચૂંટણી હારી ગયા હતા. તેમને ભારતીય જનતા પાર્ટીના ગિરિરાજ સિંહે હરાવ્યા હતા. કન્હૈયા કુમાર સપ્ટેમ્બર 2021માં સીપીઆઈ છોડીને કોંગ્રેસમાં જોડાયા હતા.

કોંગ્રેસમાં જોડાયા બાદ તેમણે કહ્યું હતું કે હું કોંગ્રેસમાં જોડાઈ રહ્યો છું કારણ કે તે માત્ર એક પાર્ટી નથી, એક વિચાર છે. તે દેશની સૌથી જૂની અને સૌથી લોકશાહી પાર્ટી છે. માત્ર હું જ નહીં, ઘણા લોકો એવું વિચારે છે કે કોંગ્રેસ વિના દેશ ટકી શકશે નહીં.

દિલ્હી પોલીસે 2016માં ધરપકડ કરી હતી

ફેબ્રુઆરી 2016માં, કન્હૈયા કુમારની દિલ્હી પોલીસે JNUમાં એક કાર્યક્રમમાં રાજદ્રોહના આરોપમાં ધરપકડ કરી હતી. કન્હૈયા કુમારની ધરપકડ પર વિરોધ પક્ષો, વિદ્યાર્થીઓએ આકરી પ્રતિક્રિયા આપી હતી. તેમની ધરપકડના વિરોધમાં જેએનયુના વિદ્યાર્થીઓ હડતાળ પર ઉતર્યા હતા.

NSUIની રચના 1971માં થઈ હતી

NSUIની સ્થાપના 9 એપ્રિલ 1971ના રોજ થઈ હતી. જે કોંગ્રેસની વિદ્યાર્થી પાંખ છે. કેરળ સ્ટુડન્ટ્સ યુનિયન અને પશ્ચિમ બંગાળ સ્ટેટ સ્ટુડન્ટ્સ કાઉન્સિલને એક રાષ્ટ્રીય વિદ્યાર્થી સંગઠન બનાવવા માટે મર્જ કર્યા પછી આ સંગઠનની સ્થાપના ઈન્દિરા ગાંધીએ કરી હતી.