ભરતપુર અકસ્માતઃ નેશનલ હાઈવે પર મોતનો તાંડવ,ભાવનગરથી આગ્રા જઈ રહેલા 12 લોકોનાં મોત

ગુજરાતના ભાવનગર વિસ્તારથી યુપીના આગ્રા સ્થિત મથુરા વૃંદાવન જઈ રહેલા 12 શ્રદ્ધાળુઓનું બુધવારે વહેલી સવારે એક માર્ગ અકસ્માતમાં મોત નીપજ્યું હતું. પાછળથી આવી રહેલા ટ્રેલરે શ્રદ્ધાળુઓથી ભરેલી બસને એટલી જોરથી ટક્કર મારી હતી કે અગિયાર લોકોના ઘટનાસ્થળે જ મોત થયા હતા. એક ઘાયલ વ્યક્તિનું હોસ્પિટલમાં મોત થયું હતું. રાજસ્થાનના ભરતપુર જિલ્લામાં આવેલા લખનપુરા પોલીસ સ્ટેશન વિસ્તારમાં હંતારા કલ્વર્ટ પાસે આ અકસ્માત થયો હતો.

પોલીસે જણાવ્યું કે, વહેલી સવારે 4 વાગ્યાની આસપાસ જ્યારે બસ એક કલ્વર્ટ નજીકથી પસાર થઈ રહી હતી ત્યારે અચાનક બસની ડીઝલ પાઇપ લીક થઈ ગઈ હતી. જેના કારણે બસ થંભી ગઈ હતી. બસ બંધ હોવાથી ડ્રાઈવરે નીચે ઉતરીને તપાસ કરી હતી. આ દરમિયાન બસના ડ્રાઈવરની સાથે બસમાં મુસાફરી કરી રહેલા કેટલાક લોકો પણ નીચે આવી ગયા હતા. તે હાઇવે હોવાથી તેઓ બસની પાછળ ઉભા હતા. થોડી જ વારમાં પાછળથી આવતા ટ્રેલરે બસને જોરદાર ટક્કર મારી હતી.

અકસ્માતની માહિતી મળતાં જ કલેક્ટર અને એસપી ઘટનાસ્થળે પહોંચી ગયા હતા. ઇજાગ્રસ્તોને ખાનગી વાહનો અને એમ્બ્યુલન્સ મારફતે હોસ્પિટલમાં દાખલ કરવામાં આવ્યા હતા. એક ડઝનથી વધુ લોકોને હોસ્પિટલમાં દાખલ કરવામાં આવ્યા છે. તમામ મૃતકોની ઉંમર પચાસથી સિત્તેર વર્ષની વચ્ચે છે. તમામ લોકો ગુજરાતના ભાવનગર જિલ્લાના રહેવાસી છે અને યુપી, ઉત્તરાખંડ, રાજસ્થાનમાં ધાર્મિક યાત્રાએ નીકળ્યા હતા.

આજે સવારે ભરતપુરના નાદબાઈ વિસ્તારમાં થયેલા આ અકસ્માત અંગે પોલીસે ગુજરાતમાં રહેતા પરિવારજનોને જાણ કરતાં મૃતકના પરિવારજનો ત્યાંથી ભરતપુર આવવા રવાના થયા હતા. અકસ્માતમાં અંતુભાઈ, નંદુભાઈ, લલ્લુભાઈ, ભરતભાઈ, લાલજીભાઈ, અંબા બેન, કમ્બુ બેન, રામુ બેન, મધુબેન, અંજુ બેન અને મધુ બેનનું મોત નીપજ્યું હતું. તમામ ગુજરાતના ભાવનગર જિલ્લાના રહેવાસી છે. તમામની ઉંમર પચાસથી સિત્તેર વર્ષની વચ્ચે હોવાનું કહેવાય છે.

ભરતપુર પોલીસે જણાવ્યું કે તમામ લોકો વીડિયો કોચ બસમાં મુસાફરી કરી રહ્યા હતા. આજે સવારે બસના ચાલકે કોઈ કારણોસર હંતારા પુલ પાસે બસ રોકી હતી. પાછળથી સ્પીડમાં આવી રહેલા ટ્રેલરે બસને એટલી જોરથી ટક્કર મારી હતી કે બસનો પાછળનો ભાગ ગાયબ થઈ ગયો હતો. ઉલ્લેખનીય છે કે બે દિવસ પહેલા ભરતપુરમાં પણ આવો જ મોટો અકસ્માત થયો હતો.