ભાજપે ગુજરાત અને પશ્ચિમ બંગાળમાંથી રાજ્યસભાના ઉમેદવારોની જાહેરાત કરી, જાણો કોને મળી ટીકીટ?

ભારતીય જનતા પાર્ટી (BJP) એ ગુજરાત અને પશ્ચિમ બંગાળમાંથી રાજ્યસભાના ઉમેદવારોના નામ જાહેર કર્યા છે. પાર્ટીએ ગુજરાતમાંથી બાબુભાઈ જેસંગભાઈ દેસાઈ અને કેસરીદેવ સિંહ ઝાલાને મેદાનમાં ઉતાર્યા છે, જ્યારે અનંત મહારાજને પશ્ચિમ બંગાળમાંથી મેદાનમાં ઉતાર્યા છે. પશ્ચિમ બંગાળમાંથી ભાજપ પ્રથમ વખત રાજ્યસભાની બેઠક જીતશે. અનંત મહારાજ, જેમને ભાજપે પોતાનો ઉમેદવાર બનાવ્યા છે, તેઓ રાજવંશી સમુદાયના નેતા છે અને ગ્રેટ કૂચબિહાર ચળવળના વડા પણ રહી ચૂક્યા છે. આ સાથે તેઓ કૂચ બિહાર પીપલ્સ એસોસિએશનના વડા પણ છે.

નોંધપાત્ર રીતે, નોમિનેશનની છેલ્લી તારીખ 13 જુલાઈ છે. જ્યારે ઉમેદવારી પાછી ખેંચવાની તારીખ 17 જુલાઈ રાખવામાં આવી છે. તમામ 10 બેઠકો પર 24 જુલાઈના રોજ મતદાન થશે અને તે જ દિવસે મત ગણતરી પણ કરવામાં આવશે.

જણાવી દઈએ કે ઉત્તર બંગાળમાં રાજવંશી સમુદાયનો ઘણો પ્રભાવ છે. આવી સ્થિતિમાં ભાજપને આશા છે કે અનંત મહારાજને રાજ્યસભામાં મોકલીને આગામી લોકસભા ચૂંટણીમાં પાર્ટીને આ સમુદાયનું સમર્થન મળશે. ખાસ વાત એ છે કે આ પહેલા 1952માં જનસંઘના આચાર્ય દેબ પ્રસાદ ઘોષ પશ્ચિમ બંગાળથી રાજ્યસભામાં ચૂંટાયા હતા.

ગુજરાતમાંથી ભાજપના રાજ્યસભાના ઉમેદવારો કોણ છે?

કેસરીદેવસિંહ ઝાલા વાંકાનેર એસ્ટેટના વડા છે. વાંકાનેર એસ્ટેટ રાજકોટ પાસે છે. કેસરીદેવસિંહ ઝાલાના પિતા દિગ્વિજયસિંહ ઝાલા કોંગ્રેસમાં હતા. તેઓ દેશના પ્રથમ પર્યાવરણ મંત્રી પણ હતા. કેશરીદેવસિંહ ઝાલા નરેન્દ્ર મોદીના સમયમાં ભાજપમાં આવ્યા હતા. જ્યારે કોંગ્રેસે રાજ્યસભાનાં સાંસદ શક્તિસિંહ ગોહિલને પ્રદેશ પ્રમુખ બનાવ્યા છે. તેઓ રાજપૂત સમાજમાંથી આવે છે.

શક્તિસિંહ ગોહિલને બેલેન્સ કરવા માટે તેમને રાજ્યસભાની ટિકિટ આપવામાં આવી હતી. ભાજપના અન્ય ઉમેદવાર બાબુભાઈ દેસાઈ ઓબીસી સમુદાયમાંથી આવે છે. તેઓ ધારાસભ્ય પણ રહી ચૂક્યા છે. તેમને ઉમેદવાર બનાવીને ઓબીસી સમાજને પ્રતિનિધિત્વ આપવામાં આવ્યું છે. હાલમાં તેઓ ગુજરાતમાં ભાજપના ગોવર્ધન સેલના વડા છે.