પાકિસ્તાનમાં વરસાદે તારાજી વેરી, 86 લોકોના મોત અને 150 જેટલા ઘાયલ

દુનિયાના ઘણા દેશોમાં જ્યાં આ સમયે આકરી ગરમી જોવા મળી રહી છે, ત્યારે ઘણા દેશોમાં ભારે વરસાદે તબાહી મચાવી છે. ઘણા દેશોમાં મુશળધાર વરસાદને કારણે લોકોને ભારે મુશ્કેલીનો સામનો કરવો પડી રહ્યો છે. આ દેશોમાં પાકિસ્તાનનું નામ પણ સામેલ છે. હાલમાં પાકિસ્તાનમાં મુશળધાર વરસાદ ચાલુ છે અને તે અટકવાનું નામ નથી લઈ રહ્યો. હાલમાં પૂર્વી લાહોર સહિત દેશના ઘણા ભાગોમાં ભારે વરસાદના કારણે ભયનો માહોલ સર્જાયો છે અને લોકોને ભારે મુશ્કેલીનો સામનો કરવો પડી રહ્યો છે.

મિલકતોને નુકસાન

પાકિસ્તાનમાં ભારે વરસાદને કારણે જાનમાલની સાથે-સાથે જાનહાનિ થઈ રહી છે. દેશમાં ચોમાસાના આગમન સાથે શરૂ થયેલો વરસાદ ટૂંક સમયમાં મુશળધાર વરસાદમાં ફેરવાઈ ગયો અને હવે તબાહી મચાવી રહ્યો છે. પાકિસ્તાનમાં બે અઠવાડિયાથી વધુ સમયથી પડી રહેલા વરસાદને કારણે દેશભરમાં અત્યાર સુધીમાં 86 લોકોના મોત થયા છે અને લગભગ 150 લોકો ઘાયલ થયા છે. આટલું જ નહીં, વરસાદના આ કહેરથી દેશના વિવિધ ભાગોમાં લગભગ 100 ઘરોને નુકસાન થયું છે.

પૂરનું જોખમ વધ્યું

પાકિસ્તાનમાં બે અઠવાડિયાથી વધુ સમયથી દેશના વિવિધ ભાગોમાં મુશળધાર વરસાદ પડી રહ્યો છે. આવી સ્થિતિમાં દેશના ઘણા ભાગોમાં પૂરનું જોખમ વધી ગયું છે. દેશની નેશનલ ડિઝાસ્ટર મેનેજમેન્ટ ઓથોરિટીએ આ વર્ષે પહેલાથી જ પૂરની ચેતવણી જારી કરી દીધી હતી.

પૂરના કારણે સ્થિતિ ખરાબ થઈ શકે છે

જો ગત વર્ષની જેમ પાકિસ્તાનમાં પૂર આવે તો આ વખતે પણ દેશમાં જાનમાલનું નુકસાન તો થશે જ સાથે જ આ અત્યંત ખરાબ તબક્કામાંથી પસાર થઈ રહેલા પાકિસ્તાનની અર્થવ્યવસ્થાને પણ ભારે ફટકો પડશે.